Monthly Archives: May 2012

Welcome

CCFC website ah arak kan lengtu nan cung ah kan i lawm hringhran. CCFC – Chin Christian Fellowship of Canada cu September 3, 2006 ah Canada ummi khuakip Chin Khrifa buu komh in dirh mi asi. Kan theih bantuk in Canada ram cu angantuk tikah khuakhat le khuakhat itlawm le ihmuh hi ahar ngaingai mi ram asi. Province 10 le Territory 3 fonh in sermi Canada ram hi vuleicung ram ah anganbik pahnihnak asi. Canada ram cu akautuk nain Canada ummi minung (Population) hi kum 2011 tiang ahcun 34 million fai deuh lawng kan si i 2016 ahcun 36 million leng kan si cang. Holh phunhnih ( Bilingual) ahmangmi ram kan si i French holh le English hi official language (cozah pommi holh) an si. Atulio Canada ram akan hruaitu cozah cu Liberal Party an si i party hotu Justin Trudeau cu Prime Minister asi. Canada cu parliamentary democracy uknak ahmangmi federal state asi. Ram uk phunghrampi ning ah siangpahrang nawlngeihnak ahmangmi (Constitutional Monarchy) ram kan si bantuk in ramlubik (head of state) cu Queen Elizabeth II hi asi.

Provinces

 QuébecOntarioBritish ColumbiaAlbertaNova ScotiaManitobaSaskatchewanNew BrunswickPrince Edward IslandNewfoundland and Labrador

Territories

Northwest Territory, Yukon, Nunavut  hi hna hi an si.

America continent chakhleicem(North) um kan si i kumkhat ah hin vur hi thla 4 chung atla nain alubik lei Nunavut hna cu kumkhat chung vur atlami ram asi. Akih caan tu cu alinh caan nak in asau deuh. Chin miphun Canada kan phaak hi 1995 hrawng in pakhat hnih te an ra nain 1999 khan tam deuh cu vun ichap asi. Atambik cu Malaysia le Delhi lei in ralzaam dirhmun in kum 2000 hnu in ara mi deuh kan si. Chin miphun tambik kan umnak cu Ontario Province ahcun Ottawa, Kitchener, Thunder Bay le Toronto ah asi i Manitoba Province ah hin Winnipeg ah an um len ve. British Columbia ah hin Vancouver ah Chin miphun tampi an um. Saskatchewan ah hin Regina le Drake khua hna ah tlawmpal an um i Alberta Province ahcun Calgary le Edmonton ah tampi an um. Cun Alberta hi Oilsand nganpi in achuahnak asi bantuk in mah Province ah hin khuakip in Camp ah rian ahung tuan mi Chin miphun kan unau tampi an um.  

CCFC riantuannak nih atinh bikmi cu Canada ramchung aummi Chin Khrifa unau vialte hi hmunkhat iton in hmunkhat ah ipumh ttinak le rualrem khuakhan ttinak (Conference) ngeih khawhnak, hika ramchung ah pumpak nih kan herhmi thiam cawnnak (Leadership Training) tete tuah in kan miphun hmailei kar ahlan venak ah bawmtu asi ding mi kha hmunkip in kawl in ttuanti ding kha asi. CCFC cu hlan deuh ahcun kumkhat voikhat in conference ngeih asi tawn nain umkal nak ahar deuh caah atu cu kumhnih voikhat in kan tuah than. Conference nih hruaitu upa paohpaoh athim hna. Khuakip aummi Chin Khrifa buu pakhat cio ah hin CCFC palai 4 cio um asi; church pastor, church chairman, nubu chairperson le mino chairman an si. 2016 tiang ah hin CCFC chungtel Khrifa buu cu atanglei buu (10) hna hi an si.

CCFC Chungtel Khrifa Buu (10 ) hna an min le an umnak khua pawl

1. Vancouver Chin Baptist Church (VCBC, Vancouver)
2. Calgary Chin Evangelical Fellowship (CCEF, Calgary)
3. Edmonton Chin Church (ECC, Edmonton)
4. Chin Christian Fellowship of Saskatchewan (CCFS, Regina)
5. Manitoba Chin Christian Fellowship (MCCF, Winnipeg)
6. Toronto Chin Christian Fellowship (TCCF, Toronto)
7. Kitchener Chin Christian Church (CCC,  Kitchener)
8. Kitchener Chin Baptist Church (CBC,  Kitchener)
9. Ottawa Chin Baptist Church (CBC,  Ottawa)
10. Seventh Day Adventist Church (SDAC, Ottawa )

Vision Ministries of Canada (VMC) nih asi khawh tawk in CCFC hi adirkamh ve.  CCFC hruaitu ah Executive Body minung 5 thim an si pin ah Nubu le Mino zong thim an si. CCFC tlangtlatu ah Board of Directors zong thim an si i CCFC chungtel Khrifa buu i pastor vialte hi Board of Ministers ah thim an si. CCFC nih tlangtlaak pinak thawng in Canada ummi Chin miphun chung in thihloh um tikah CCFC chungtel Krifa buu paoh nih Khrifa buu member zoh in bulhnak tete pek cio asi. Cun Canada ramchung ah fimcawnnak sang(Degree) ahmumi hna zong si khawh tawk in upat peknak tuah piak asi. Tlamtling lo ngai in akal cuahmah ko rih nain 2013 incun mino biatak tein an hung cawl pin ah kan nu le asimi Nubu hrimhrim nih thazaang an vun chuah taktak. Cun buukip pastor te zong nih biatak tein thazaang an vun chuah caah lomh aum hringhran. Cun church kip pastor vialte hi kumkhat voikhat in anmah tein tonnak (Pastor Retreat) an ngeih tawn bantuk in khuakip cul in pastor te nih pulpit ithlennak ( Pulpit Exchange) an kan ngeih piak lengmang fawn.

Contact Form Powered By : XYZScripts.com