Theihtlei

CCFC Conference “CCFCY Icon 2014″

Dear Canada Chin,
Atanglei hi Vancouver i tuah dingmi “CCFCY Icon 2014” kong he pehtlai in theih hngalh ding tete kan van langhter tthan.
Hika webpage zongah rel khawh asi lai. www.ccfcyicon.com
Ahodah Zuamnak Ah A tel Kho?

CCFCY ICON 2014- Reality Singing Competition cu Church-based in tuah mi asi caah CCFC chungtel asimi Khrifabu chung i mino vialte i zuam khawh an si. Khrifabu aiawhtu aum lomi, cun CCFC nih sawm loin mah nawl in ahung chuak mi caah hmunhma (seat) aum lai lo. CCFC chungtel asimi Khrifabu aiawh in aa zuam duh mi le CCFC nih sawm mi Khrihfabu poah zalawng tein lut khawh le izuam kho dih asi lai. Minung tam le tlawm rikhiah a um lo. Asinain CCFC chungtel asimi Khrifabu pakhat-khat chung in aa zuam khomi pakhat hmanh an um lo ahcun, loh thei loin an Mino hruaitu hna nih minung pahnih tal izuam ding in chuah pi asi lai.

Prepared Songs

CCFCY ICON 2014 ah aa zuammi (Contestants) dihlak nih Pathian hla, a tlawmbik fung(3) an iring lai. An sak dingmi hla hi sound-track an ngeih lai or, Sound-track asi khawh lo ahcun, Keyboard le music tling tein sak khawh an izuam lai. Hla an sakmi paoh well-prepared an si lai. CCFCY ICON 2014 hlasak izuamnak ah an sak dingmi hla cu, May 31, 2014 ah an hruaitu sin ah list an pek dih cang lai. May 31, 2014 hlan zong ah hla an sak dingmi kha pek cia khawh a si. Note: Hla nan sak dingmi kha tuan deuh ah hruaitu sinah nan pek khawh ahcun, music tumtu pawl nih an rak cawn manh ve lai tinak a si.

Song Choices/ Hla Thim

Aa  zuam dingmi ( Contestant) paoh nih anmah le an duhmi hla an ithim khawh. A zuam dingmi pakhat le khat an hla thim aa khat sual hmanh ah a poi lai lo. Hla an thim dingmi cu “Pathian Hla” asi lai. Lai hla or Mirang hla or an duhmi hla paoh an ithim in sak khawh a si lai. Pathian hla a si phawt ahcun!
Contestants mentors/ A zuam dingmi Cawnpiaktu

CCFCY ICON 2014- reality Singing competion ah hlasak aa zuam dingmi paoh cu, CCFCY Conference an kal hlang tiang ah an mentors/ cawnpiaktu cu local anmah le an church cio ah mino hruaitu an si lai. An mino hruaitu nih hla thim an bawmh hna lai. Music tling tein hla cawnnak an ser piak hna lai. Test-nak le practice nak ah anmah le an church cio ah an sakter hmasa hna lai. Hlasak ningcang a thiammi an sawmpiak hna lai i, an chimhter hna lai.

Rehearsal/ Song/ Music Practice

CCFC Conference ah CCFCY ICON izuamnak ni le caan aphaak hlan chung, June 29 hlan paoh kha, zan fatin pumh dih ah hlacawnnak le practice nak a um lai. Music tling tein hla cawnnak tuah piak an si lai. Stage cungah dirning, hlasakning, action le Stage cungah luh-chuahning dihlak cawnpiak a si lai.  CCFC Conference chung le CCFCY ICON chung dihlak, hlasak, cawnnak le aherhmi dihlak Pi Sui Tin Fam nih a cawnpiak hna lai. Elimination Policy CCFCY ICON 2014 ah aa zuammi dihlak nih June 30, 2014 zaan ah hla an sak (audition an tuah) dih lai. Mah a zaan khatnak ah hla an sakmi chung in a thiam timi half kha Judges nih an thim hna lai i, a zaan khatnak a dihnak program ah phuan colh a si lai. Mah a zaan khatnak ah hin half an tang lai i, half an tla lai tinak a si. Phun dang in chim ahcun, a zaan khatnak hi, full audition night a si lai caah, concert bantuk a si lai tinak a si. Cun, azan hnihnak, July 1 zaan ah hin a zaan khatnak chung in audition in an thimmi hna half kha an izuam lai. Mah half a tangmi chung in Top 6 judge nih an thim hna lai. Cun, Top 6 an thim dih hnu ah hla an sa rih lai i, Top 3 an thim tthan hna lai. Top 3 an thim dih hnu ah hla an sakter tthan hna lai i, Final an thim hna lai. Final adih bak in Winner Celebration le award peknak nih ahung zulh colh te lai.

Note: mah selection process hi cu contestant milu zoh chih in judges nih an thleng khawh timi a si.

CCFCY Icon Winner:

CCFCY ICON 2014 winner laksawng cu CANADA Dollar, Special Designed Trophy le Music Recording Contract a si lai.
CCFCY ICON- Reality-Singing competition kong fiang deuh in hngalh aduh mi paoh nih ccfcmino@gmail.com or ccfcyicon or Canada Chin Mino Facebook page ah hal khawh peng a si lai.

Public Information
Chin Christian Fellowship of Canada Youth

_________________________________________________________________________________

 

 2014 CCFC Leadership Training Kong

Upatmi Pastors & Krifa Buu le Hruaitu hna,

Hmasabik ah Kumthar lawmhnak cu, nan cung le nan Krifa Buu cio ah tlung hram ko seh.

Tukum cu Buu kip nawn in thimnak tete kan ngeihnak ah tlamtlinnak an ngei cio hna tiah thawng kan theih ca zongah Pathian min cu thangtthat si ko seh.

Nan Krifa Buu cio i rian nan i phawtnak tete ah atlam atling kho rih lomi zong a um rih ko lai nain, kan Leadership Training nih avun kan neih chin lengmang caah, Inntek(host, KW- Chin Christian Church) lei zongin siseh, kan fa le March School Break an neih lio caan he atong ding in atanglei ni le caan ah hin a ttha bik lai tiah tuah ding in thawng ka vun in thanh hna. Rat khawh rak i zuam cio hram uh tiah Bawi Khrih min in ka vun in sawm duh fawn hna. Nan duh mi topic tete pawl zong rak chim cio dingin ka vun in sawm chih ka nin duh ko hna.

Cun, Inntek (KW-CCC) cung zongah lunglawmhnak tampi kan ngei i, an dih heu mi cung ah Pathian nih a let zakhat in cham tthan hram ko hna seh tiin le  kan i timh ningin tlam a tlin khawhnak hnga Bawipa nih lam kan hruai hram ko seh tiah thlacam bu in,

Upatnak he,

 

Salai Cung Cin

Director

Chin Christian Fellowship of Canada (CCFC)

 

                                    2014 CCFC Leadership Training Date:

Arrival:                           March 13, 2014

Training date:                  March 14-15, 2014

Worship Together:          March 16, 2014

Departure:                      March 17,2014

_____________________________________________________________________

Pulpit Exchange tlamtling tein kan dih

Pathian lamhruainak le CCFC kan pastor te vialte zuamnak thawng in CCFC nih kum (6) chung ah avoikhatnak “Pulpit Exchange” atuah mi cu tukum April 28, 2013 ah tlamtling tein tuah asi. Kitchener CBC pastor Van Kung cu Vancouver (VCBC) Krifa buu sin ah akal i Vancouver VCBC pastor Pastor Cung Bawi Bawi Thawng cu Kitchener ah ara kho ve. Cun VCBC pastor Ceu Hrin zong damtein Toronto ah ara kho i Regina lei in Rev. Zabiak Cung cu Ottawa Krifa buu ah arak ra kho ve. Tutan ah pal khawh rih lomi khua pawl kha August ( second round) ah tlawn dih ding asi.

Hi bantuk in khuakip kan pastor te ithlennak kan tuah khawh mi hi Krifa buu cio hrim nih thazaang nan chuah nak thawng in asi caah lunglomhnak kan chim cawk lo. Hmailei ahcun duhsah tein kar kan hlang chin lengmang lai i Pathian nih akan umpi hrimhrim ko ti kan theih caah kan hna a ngam.

_________________________________________________________________________

Pulpit Exchange thok asi cang lai

CCFC – Chin Christian Fellowship of Canada nih Canada ramchung ah pastor kan ngeih mi pawl cu 2012 Conference pi biachahnak bantuk in pastor te phungchim  ithlennak( Pulpit Exchange) kha tuthla ( April 26, 2013 ) in thok ding asi cang. Mah Pulpit Exchange kong ah Board of Trustees kan thimmi hna chung in Organizer cu Pastor Cung Bawi Thawng asi. Fiang deuh in theih aduhmi nih Pastor Cung Bawi Thawng cellphone +1(604) 626- 1365 ah rak chonh khawh asi.

Upatmi Hruai tu hna,

Kan hnu nai Vancouver Leadership Training lio ah kan rak ceih ning khan, CCFC Pastors pawl he bia ceihnak kan ngei tthan hna i, a tanglei bantuk in kum 1 voi 3 tlawn dingin kan ti;

1.    April 28, 2013

2.   August 11, 2013

3.   Dec 8, 2013

Atutan April 28, 2013 weekend ah a tlawng kho ding mi Pastors pawl cu atanglei bantuk hi an si.  Air tickets pawl zong cawk dih a si cang. Itinerary tu kha cu an mah Pastors pawl tu nih Local ah khan an in thanh chin te hna lai.

Departure:   Friday,    April 26, 2013

Return:          Monday, April 29, 2013
1. VCBC Pastor Cung Bawi Thawng  - to CBC Kitchener & CCC Kitchener
2. CBC Kitchener Pastor Van Kung – to VCBC
3. CCFS Pastor Zabiak Cung – to CBC Ottawa & SDA Ottawa
4. ACCF Pastor Lalmuamkima Zawzaw -to MCCF Winnipeg
5. VCBC Pastor Ceu Hrin -to TCCF Toronto
Dam tein an kal um khawh nak caah thlacamnak in thei cio hna uh sih law, cun don le thlahnak kong ah Local Church pawl nih zaanghlei cawi in rak kan tawlrel piak hram ko uh tiah kan vun in nawl duh ko hna.
Asi khawh a si ah cun, mah April 28 ah khin, 2nd Offering nan kan tuah piak khawh ahcun  kan i lawm tuk ko hnga tiah Bawi Khrih min in nawl tthan bu in,
Salai Cung Cin

__________________________________________________________________

March 22, 2013 ( CCFC Leadership Training ( Vancouver ) ah Lawyer Mr. Thomas nih akan cawnpiak mi )

 

INN, LO, RAM I  CAWK NAKAH CANADA RAM  NIH A NEIH MI LAW

By Alastair Rees – Thomas ( Lawyer)

1. REAL ESTATE LAW ( INN, LO, RAM CAWK TIK AH THEIH DING MI LAW )

Inn, lo, Ram  thilri vialte hi khawpi chung zokhentu zung ( City Properties  Office) ah cazin chiah dih an si.

Inn kan cawktikah theih a herh ngai ngai mi hna: Sihni ( Lawyer)  hlan hrim hrim kan hau, aruang cu kan mah kan him nak ding caah asi. Inn cawtu le Inn zuartu hna nih sihni (Lawer) an neih veve ahau. Inn cawtu Sihni (Lawer) nih a tuah mi cu Inn, Lo, Ram Zung ah Inn Cawk nak kong he pehtlai in aherh mi vialte aherhning in Inn cawtu hna caah a tuah piak hna.

Inn na cawk tikah Bank i phaisa cawi na duh tikah theih aherh mi hna: Kum(1) chung or Thla (1) chung ah phaisa zeizat dah na hmuh/ nan hmu, zeizat dah Bank ah Phaisa nan neih ti an zoh hmasat lai. Bank riantuantu hna nih Inn caw kho dirhmun ah na dir ko  ti an in theih pi hnu lawng lawng ah Inn na caw kho.

Inn, Lo, Ram cawktikah Sihni (Lawyer) hna nawl an neih nak: Sihni (Lawer) cu Inn, Lo, ram cawknak ah alubik nawlngeihnak a ngeitu ansi.

Inn, Lo, Ram cawk tikah Sihni (Lawer) nih an theihpi hrim hrim a herhmi hna: Avoi khat nak pekmi Bill vialte

(a) Inn, Lo, Ram na pek nak caazin (Bill)

(b) Water Bill, Electic Bill, Power Bill, Energy Bill, Properties Bill hna hi an si.

 Inn Cawtu nih Inn rawh le remh aherh tikah theih ding mi hna:  Mei, Inn lumternak mei, Zunput luannak le Ti lam an rawh tikah nangmah nawl in  na theih mi poh an thiam ko ai ti in remhter hna lo ding. Cozah nih a theih pi mi hna le Certificate/ Licence a ngeimi hna lawng nih remhnak nawl an ngei. Nangmah thiamnak le kan thei ve ko ti in nan tuah i thil poipang hna nan chuahter ahcun Khuapi chung riantuantu nawl ngeitu hna nih na cungah dantat nak aherh ning in an lak lai.

Inn hmunthar cawk tikah theih ding mi hna: Inn, Lo, Ram zungah sak khawh nak nawl ( permit) lak a hau, cun zei tikah ni/can ah dah na sak lai, Dot zeizat dah asi lai, zei bantuk pungsan dah asi lai, a lianh / a hmet ning zawng asining  le na  timh ning vialte na chim dih hna a hau.

Condo/Complex (Inn khan/Inn a Bu in sakmi) cawk tikah theih aherh mi hna: Condo/ Complex Inn tlaitu hna i an neih mi dun le dan vial te kha na zulh dih hna an hau. Eg, nangmah duh poh in na Inn kha na remh kho lo, na thet kho fawn lo, nan Inn leng lei rawng nai thlen kho lo, Inn chung na remh ah siseh a lenglei na remh ah siseh na remhnak i a dih mi Bill vialte kha thate in na chiah dih hna lai. Na duh mi  Inn zuat sathil poh na  nai um pi kho lo, kha Condominium/ Complex i an zulhphung ( rule and regulation) nih an  awnh mi  Inn zuat sathil lawng nai um pi khawh.

Biakinn Saknak: Biakinn hi khuapi chungah khoika poh ah/ Inn hmun lawn nak poh ah/ nangmah nih a vulei na cawkmi asi zongah sak khawh asilo .Khuapi chung nawlngeitu hna nih Biakinn saknak ding hmun an tuahnak lawng ah sak khawh asi.

2. SMALL BUSINESS LAW ( RIANTUANTU/RIANNEITU NIH THEIH DING MI DUN LE DAN)

Rianngeitu na si ahcun na duh mi min poh bunh khawh nak nawl na ngei, cun na duh mi poh pehtleihnak nawl na ngei fawn. Income TAX na tuah tikah  zung i na hman mi Bill vialte, Seh thilri le na rian kong he pehtlai in na cawk / na hman mi vial te kha Income TAX ah na  tuah chih khawn dih hna. Na motor, Gas, Insurance, ai rawk mi remhnak vialte zong kha na tuah chih khawh dih.

Rian chuah nak le Dinhter nak: Nan pu le te nawl na ngeih lo ah siseh, na zulhlo ah siseh, nan rian tuannak nih a ngeihmi phunglam na zulh lo ah siseh, upatnak he rian tuan loh ahcun rian phoih nak nawl le dinhternak nawl an ngei.

Harassment/ Sexual Harassment (Mi duh loning in tuaitham/Mi hna hnawhnak pek): Mi duh lo / huatzawng i bia chim, Tawngh an duh lonak hmun  i tongh/ tuaitham. Zomhteih/ Thleidan nak ngeih le mi hnahnawhnak pek, Hi pawl ah hin  na rian in phuah khawh na si.

Rian Chuah ( Quit ) na duh tikah na theih aherhmi cu aruang pakhat khat kong ah chuah na timh ahcun Union pakhat khat sin ah asi lo ahcun Lawyer pakhat sin ah chim hna law na chuak tikah pakhat khat tuah piak khawhnak anin ngeih khawh mi asi. Kanmah palh lo ruang bak ah alaka in sungh in rian chuah hna kan si kho men caah theih pitu um in rian chuah hi athacem mi cu asi. Cun micheu nih riantuannak hmun i boss te nih khin kan sual/palhnak aum mi khi Human Resource zung tiang le kan Social Insurance tiang ah an khumh kho maw ti biahalnak aum tawn i mah tiang kha zei bantuk rianngeitu (employer) hmanh nih tuahnak nawl an ngei lo. Kan social insurance tiang ah khumhnak nawl/ zohnak nawl angeitu cu police lawng an si.

Ruantuan man /Hlawh kong ah theih ding:   Canada ramchung khoika rian na tuan nak hmanh ah na riantuan man kong ah hlawh (pay) na hmuh lo ahcun nan riantuannak Province i Minister of Labour ( ruantuannak lei kong tlaitu vuanci zung) tang ah Branch pakhat aum i cucu – Employment Standard Branch (ESB) timi an si i an mah cu na chimh hna lai. Anmah ESB zung nihcun na hlawh an pe lotu ( company or employer ) kha dan an tat khawh / an company an phih khawh. Cucaah na umnak Province pohpoh ah ESB an telephone le fax theih izuam zungzal. Asinain mihmuh kuttongh thilri ( evidence ) um loin kaa (verbal) sawh sawh in hlawh ka pe lo ti bantuk va chim kha cu bomh ding na har ngai ngai lai pin ah na hmuh ding ahar fawn lai. Cucaah thilri (evidence ) na ngeih mi poh chuah pi na zuam hrimhrim ve ahau.

 INN CHUNGKHAR KAWNG

                                                                        By Margareth (VLMMFSS ) 

1.Canada ram kan um tikah mipem mi hna nih theih kan herh ngai ngai mi hna: Fa le te Fung in tuk lo ding, bengh lo ding, vuak lo ding. hma,  avual mi benghnak neh , tuknak neh he sianginn an kai i an Saya le te nih an hmuh, an theih hna ah i ka nu ka pa nih an ka tuknak asi an ti ahcun  Police nih nan fa le te an lak hna lai maw, asi lo ah nanmah nuva maw aherhning in  dantatnak an nin pek khawh hna.

2. Nupi le Pasal karlak: Nupi le Pasal karlak ah sik vuak nak a um tikah Police 911 nan kawh tikah theih dingmi:

Police 911 Nan kawh tik hna ah buainak alian/ahme azei bantuk asi paoh ah an mah kut chungah nan um cang. Cucaah nan biachim mi nan duh poh in nan let kho lai lo. Police nan Inn an hung phak tikah nan nuva adang veve in bia an in hal hna lai i voikhat lung thawh i duak ti in asi paoh si ko usih ti in bia nan duh mi paoh chim lo ding, hmai lei ah nan caah atha lai lo. Laimi kan zia cu lungkur ruangmang than i Pa te pa / Nute nu tel locun ti in awlokchong in khuami Upa hna le Pastor te rian le khai karlak ah buaiter than kan hmang tawn fawn hna i, asi khawh ahcun kan kawh hna lo le kawh lo ding in ka um kha atha bik ko. Nupi le Pasal  karlak ah thazaang in maw, tangka kongah maw, ihrocer nak in maw, ningzah ternak in maw, hremnak in maw harsatnak i pek tawn asi. Hi  harsatnak pakhat khat na tawn tikah na khua ah “Family Service” riantuantu hna na chawnh hna lai i an mah nih nan herh ningin bawmh chanhnak le aherh ningin khua anin khan pi lai. Cun nule va isiknak kong ah police nih biahal tikah thinhun lung in va le kha fak hrimhrim seh ti in asualnak leng in chim prh kha tihnung cemmi asi. Zeicatiah misual (criminal) dirhmun in thong hna atlak ahcun hmailei ah rian (employment) hmuhnak hrimhrim kha adonh cang caah innchungkhar rawhnak tiang achuak.

Legal Aid ( Cozah sermi upadi lei le adangdang kong ah bomhnak )

Canada ram chung ahcun khuakip ah Legal Aid timi aum dih. Mi harsa deuh asimi hna nih harnak ( abik in sualnak – criminal charge he apehtlai mi kong ah bomh chanh an duh tikah ) Legal Aid ah hin man lo (free) in hal khawh asi. Asinain ahram thok ah na income (phaisa lutchuak) an zoh hmasa lai, cun nan innchungkhar income an zoh dih hnu lawng ah Legal Aid pek awk tlak na si le si lo kha an tuak lai. Asinain Legal Aid nih mi abomh mi hna cu thongtla ding dirhmun ( Criminal charge seeking imprisonment ) asimi lawng abomh hna. Bianabia ah zurit bu in motor mongh ruang ah palik tleih i taza zung (court ) kai ding na si ahcun avoikhatnak sualnak tuah mi cu Legal Aid nih abawm lai lo, zeicatiah thongtla ding dirhmun asi lo poh ahcun abawm lo. Asinain voikhat sualnak asi zong ah asualnak (crime) kha angan ngai ahcun thongtla kho thiam thiam asi caah Legal Aid nih bomh khawh asi than.

————————————————————————————————————

Khrifabu Meeting Tuahthiamnak

1. Biadomhnak:

Khrihfabu hruainak ah phungchim le thlacam lawngin a za lo. Khrihfabu ṭhanchonak caah biaceih le khuakhan a herh. Meting tuah hi ṭhancho phunkhat a si. Zeicatiah biakhiahmi nih thilṭha tampi a chuahpi. Meting ah cun mizapi le mi tam deuh ruahnak kha laak a si caah a ṭhathnemnak a um. Asinain meting a tuah zia kan thiam lo tikah buainak a chuahpi caan a um ve tawn. Hmailei ṭhanchonak vialte hi meting khuakhannak in a s a si caah zoh dawhte le  ṭhahnem santlai ngai in tuah thiam a herh. A bik in Baptist Khrihfabu hi meting a uar ngaimi kan si. Kan meting a sau tuk tawn n. Cunglei uk mi siloin mah tein biaceih khuakhannak nawl kan ngeih caah ceihkhan awk a tam tuk caah a si. Cun biaceih awk a tam lawng si loin meting tuah zia kan thiam lo ca zongah a si. Meting tuahning hi cauk ngan pipi in an chuahmi a si nain a herh deuh tete kan hun langhter lai.

2. Meting tuahning cauk (Robertś Rules and Order):

Meting tuahning cauk parliamentary Procedures hi American ralbawi Henry M. Robert nih 1863 ah a rak ṭialmi a si. A min ah “Robertś Rules of Order” an ti. Amah hi khrihfa ṭha ngai a si i, upat hmaizahmi a si bantuk in Khrihfabu he a pehtlaimi meting pakhat ah chairman ṭuan an fial. Uunak lei he aa dan deuh caah a thiam lo i biaknak lei meting tuahning cauk pakhat in ṭial a herh ti kha a lungchungah a chuak. Khrihfa meting asiloah cozah a si lomi Non-Governmental Organizations (NGO) hna caah meting tuahnak ah hman khawh dingin cauk a ṭial. Mah cauk cu cherhchan laak cio in nihin ni tiang vawlei pumpi in hman a si. Hi cauk hi catlap hmai 176 a si nain a hnuah hrilhfiah an ṭial chap lengmang i hmai 600 tiang a chuak. Kanmah he aa pehtlai kha a tawinak in ka hun ṭial.

3. Meting Tuahnak Nih Aa Tinhmi:

  1. Meting zoh dawh le felte in tuah khawhnak
  2. Mi tam deuh hnatlaknak in bia khiah khawhnak
  3. Mi tlawm deuh duhnak kha hmaizahpiaknak
  4. Meting a kaimi paoh nih bia chim khawhnak le biatung dirh khawhnak
  5. Meting a kaimi paoh nawlngeihnak i tluk cio khawhnak
  6. Bu dirhning le hruainak upadi phung suai thiamnak
  7. Biaceih ding agenda suai thiamnak
  8. Chairman le a dang hruaitu hna nih an rian an i theih khawhnak
  9. Meting a kaimi hna nih zohdawh zohrem tein biachim thiamnak
  10. A caan ngeihmi chungah zoh dawh zoh remte in bia chim thiamnak
  11. Baiceihmi ṭialning le biakhiah thiamnak, te hna caah a si.

4. Meting Timhlamhnak 

  1. Meting sawmnak ca kuat ding, a caan le a hmun fiangte in ṭial ding
  2. Ceih dingmi agenda kha Pastor, Church Chiarman le Secretary hna nih ṭhate in Khrihfabu caah ceih awk a herhmi kha an ruahcia lai. Khrihfabu ṭhanchonak caah chunmang ṭhaṭha an manh lai i, ceihkhan awk ah an chuahpi lai. Timhcianak ṭhate in an ngeih ahcun, biaceih khuakhan tikah rian a fawiter deuh.
  3. Meting caah a herhmi ṭhutnak, a khan, ca, upadi, eidin, tlamtling tein timhlamh dih ding
  4. Meting kaimi cazin, biaceihmi ṭialtu, ṭialning, a ningcang tein tuah ding
  5. Meting he aa pehtlaimi paoh ṭhate in ruahcia le timhlamh dih ding. Timhlamhnak a ṭhat ahcun a ningcangte in a kal kho i meting tuahmi sullam a ngeih pinah a kaimi zong an i nuam.

5. Chairman Rian

Meting chairman a thiammi nih an ṭuan ahcun meting a nuam i biakhiah a fawi. A kaimi zong an tha a nuam i Khrihfabu caah ṭhathnemnak a chuahpi. Meting a tluan khawhnak caah Chiarman cu a biapi ngaimi a si. A rian a biapi deuh hna cu:

  1. Meting dawhte le remte in a kal khawh nakhnga a rian ngan bik a si.
  2. Mithmai in siseh, kaa in siseh, meting a kaimi cungah duhdanhnak a ngei lai lo. Biakhiahnak dik a chuah khawhnak aa zuam lai.
  3. Daihnak le upat awktlak mithmai put aa zuam lai.
  4. Midang chimmi bia kha ṭhate in ngaih le theihpiak aa zuam lai.
  5. Biaceihmi agenda pial lote in kanh aa zuam lai.
  6. Biapi le biate a ṭhenhai thiam lai. Caan a upatmi a si lai.
  7. Ruahnak kaumi le lungsaumi a si lai.
  8. Bu hruainak phung upadi a thiammi a si lai.
  9. Bia tam tuk a chim lai lo. Midang lung fiannak caah a fianter lai.
  10. Biachim rih lomi caan pek le ruahnak hal aa zuam peng lai.
  11. Meting a kaimi thinlung theih khawh aa zuam lai.
  12. Khrihfabu cungah dawtnak le siaherhnak nganpi a ngei lai.
  13. Meting tuah tikah Pathian duhnak kha kawl le ruah peng aa zuam lai.
  14. Bia chim le ceihhmai a duh ahcun a bawmtu kha chairman a ṭuanter lai.
  15. Me an i zah sual ahcun biakhiahnak a tuah lai.
  16. Buainak a um sual ahcun daihter aa zuam lai.
  17. Meting a buai tuk ahcun meting kha a thwn khawh lai.

6. Meting A Kaimi Hna An Rian

Meting a kaimi hna an rian hi a biapi tuk ve. Pakhat cio nih thilṭha a chuah khawh nakhnga an i zuam cio lai. Khrihfabu dawtnak thinlung an ngei lai i bia an chim tikah khuaruat bute in a ṭhahnemmi bia kha an chim lai. A biapi deuhdeuh hna cu:

  1.  Ceihmi a kong agenda an theih lai. Thei satsai loin bia a chim lai lo.
  2. Midnag bia chimmi ṭhate in a ngaih lai. Bia lutaw theih aa zuam lai.
  3. Biadawh lo, bia chiakha an chim lai lo. Biadawh holhdwh an hman lai.
  4. Pumpak ngiarnak, zapi caah theih nuam lomi chim an hrial lai.
  5. Chiarman kha upat hmaizahnak an ngei lai.
  6. Ceih liomi bia he aa pehtlai lomi an chim lai lo.
  7. Minung hawi he biaceih a sinain, Pathian a kai ve ti a hngalh lai i ṭihzahnak he a chim lai.
  8. Bia chim an duh tikah Chiarman hnatlaknak an laak lai.
  9. Bia chim a duhmi nih kutthlir, asiloah, “Chairman” tiah an au hmasa lai.
  10. Agenda ceih liomi pakhat ah voihnih cung chim lo a `ha bik.
  11. Meting chungah a thin a tawi lai lo. Thinhun ahcun palh a fawi tuk ti a theih peng lai
  12. Voikhat chim ah sau tuk in a chim lai lo, tawi fiang in chim aa zuam lai.
  13. Phungchim tazahawt phun in chim lo ding. A duhnak te lawng kha a fianter lai.
  14. Midang an chim lioah dirchih, chimchih an hmang lai lo.
  15. Zapi hnatlakmi kha cohlan khawh aa zuam lai.
  16. A dongh tiangin kai aa zuam lai i caan upat aa zuam lai.

7. A Tlamtlingmi Meting Biakhiahning

  1. Hruainak Phunghram le Phungṭengning in, zatceo maw, cheuthum cheuhnih an kai tikah tlamtlinngmi meting tuah khawh a si.
  2. Meting kai ding (quarum) an tlin lo tikah an thawn lai i meting dang an auh lai. Auhṭhanmi meting ah cun a kaimi paoh nih biaceih khawhnak a um.
  3. Bia sawhsawh cu mi tam deuh hnatlaknak (simple majority) in biakhiah khawh a si.
  4. A biapimi cu cheuthum cheuhnih hnatlaknak (2/3 majority) in biakhiah a si.
  5. Zapi hnatlaknak in (unanimous consensus) biakhiah hi a ṭha bik.
  6. Hruainak Phunghram le Phungṭeng hna ning in zulh ding.

8. Biatung Dirhning (Asu Tunning)

  1. Phunghram le phungṭengning in meting a kaimi nih biatung a dirh khawh lai.
  2. Dirhkamhtu a ngeih lawngah a dirhmi biatung a nung kho.
  3. Biatung zeizat dah a um kho lai? Dirhkamhtu (Consensus) a ngeih lo ahcun biatung pahnih hi aṭha bik.
  4. Lakhruak biatung (privileged motion)
  5. Biatung dirhmi remhnak (to amend)
  6. Kawmiṭi kut ah chiahnak (to commit)
  7. Thawnmi biatung (to postpone)
  8. Ceihciami ruahṭhannak (to reconsider); 2/3 me a herh.

10. A Nuammi Le A ṭhami Meting

  1. Chairman nih zoh dawhte le tluangte in a hruai thiam tikah.
  2. Meting a kaimi nih meting upat hmaizahnak an ngeih tikah.
  3. Tawi fiang le zapi theih khawh awkin an chim cio tikah.
  4. Meting chungah thin sauté le Pathian ṭihzah bu in bia an chim cio tikah.
  5. Biahalnak in thok lo ding (leading, siloin, open-ended question) – “A si ko lo maw? Biakinn remh ding nan hna a tla ko lo maw? tiin chim lo ding. “Biakinn remh hi a herh ngai caah zeitindah nan ruah cio?” ti ding a si.
  6. Bia ngaihzia thiam le bia lutaw thei bute in an chim cio tikah.
  7. A fimthiam le a hngal deuh sinah ruahnak laakzia an thiam tikah.
  8. Meting a caan chung an lim khawh tikah.
  9. Thinhunnak le pumpak ertaunak a um lo tikah.
  10. Bia funzia an thiam tikah.
  11. Zapi hnatlaknak in biakhiahnak a um khawh tikah.
  12. Khrihfabu caah a  ṭhahnemmi bia an khiah khawh tikah.

11. A Nuam Lomi Meting

  1. Zapi  ṭhatnak zoh loin mah duhnak lawngin a kalpimi an um tikah.
  2. Holh tam tuk le atu le atu a thomi an um tikah (agenda pakhat ah voihnihnak tam chim lo ah a ṭha bik)
  3. Thinhunnak le sikṭhiatnak a um tikah.
  4. Mi duhdanhnak le zeirel lonak le i hmuh thiam lonak a um tikah.
  5. Biachimtu nih sau tuk le cawnpiak phun in an chim tikah.
  6. Biathlir cawi hmangmi, a si loning (negative) tuk in a letthalmi an um tikah.
  7. Meting upatzia an thiam lo tikah.
  8. A dai tukmi, asiloah, a lung a tho lomi an tam tikah.
  9. Chairman a ṭuanmi zei an rel hna lo tikah.
  10. Pumpak miaknak le minthannak a kawlmi an um tikah.
  11. Biakhiahmi an duh lo tikah, an pom khawh lo tikah.

12. Meting Biakhiahmi Fehternak

  1. Meting tuah tikah a hlan meting biakhiahmi kha relṭhan ding.
  2. Ceihningte in aa ṭial maw, hrelhmi, chapmi a um sual maw, tiah zoh ṭhan ding.
  3. Ceihning deuh in  ṭial a si lo ahcun, remhṭhan ding.
  4. Biafang hmanmi zapi theih khawhmi hman ding.
  5. Meting a rak kaimi lawng nih fehternak biatung dirh le dirkamh khawh ding.

13. Meting Tuahmi Zohṭhannak

  1. Chairman  ṭuan a thiam maw?
  2. Meting kaimi lunglawm thanuamte in an um maw?
  3. Meting sawmmi tlamtling in an kai maw?
  4. Report le caṭialmi palh lo le tlingte in a um maw?
  5. Eidin a thaw maw, zohkhenhning a ṭha maw?
  6. A ṭhahnemmi biakhiahnak a chuak kho maw?
  7. Meting nih aa tinhmi le saduhthahmi a phan kho maw?
  8. Meting kaimi pakhat le pakhat upat hmaizahnak an i ngei hna maw?
  9. Hruainak Phunglam he ai ralkah in biakhiahmi a um maw?
  10. Zapi ruahnak in a kal maw? Mi tlawmte duhnak lawngin dah a si?
  11. Meting tuahnak hmun le meting tuahnak khaan a nuam maw?
  12. Zeitindah hmailei ah kan ṭhanter khawh deuh lai? Ruahnak cheuhnak tuah ding.

13. A bu in rianṭuannak ah ṭhanchonak a um khawhnak

  1. Ruannak le zapi tel khawhnak a um tikah (Balance composition)
  2. Ruahnak thar hruaitu hna nih an chuahpi khawh tikah. (creative thinking)
  3. Lungthawhnak a um tikah. (enthusiasm and motivation)
  4. Hmailei thil hmuh khawhnak a um tikah. (clear vision for the future)
  5. Palhnak kha ṭhatnak in thlen khawhnak aum tikah.
  6. A ṭhalei hoih in zoh thiam le ruah thiamnak a um tikah (Positive attitudes)
  7. Pakhat le pakhat karah pehtlaihnak a ṭhat tikah (understanding)
  8. Tuah ciami kha zoh ṭhannak a um lengmang tikah. (regular evaluation)
  9. Pathain ṭihzahnak le upatnak he rianṭuannak a um cio tikah

Biafunnak: A cunglei kan  ṭialmi hna hi mibu hruainak le meting tuahnak ah a herhmi tlawmpalte lawng a si. A tlamtling mi a si lo. Upadi bantuk in ruat loin mah le Khrihfabu le hruaitu hna nih a herhning le aṭhat bik ningin hman khawh a si.

Alettu:   Rev. Dr. Sang Awr

Ca ṭialtu Chirhchanmi Cauk:

Mac Carty, Barry: A Parliamentary Guide for Church Leaders (Nashville: Broadman, 1987)
Sang Awr, Khrihfabu ṭhithruai Thiamnak (Yangon: LBC, 2004)
Mall, Jane E. Handbook for Church Secretary (Nashville: Abingdon Press, 1982)

Theihternak: Hi capar hi Muko 2005 vol. 10 No. 2 page 18-22 chung ah lak chinmi a si.

Contact Form Powered By : XYZScripts.com